Se non a mellor, si que está entre as que atesouran máis calidade entre todos os equipos do hóckey a patíns mundial. Así poderiamos definir o equipo do F. C. Barcelona, que mañá martes 25 de marzo visita o Pazo de Deportes Presidente González Laxe por segunda vez en OK Liga. A anterior foi o 24 de outubro de 2009 na quinta xornada da tempada 2009-2010, a primeira do HG C. P. Cerceda na elite do hóckey a patíns nacional. Naquela ocasión o resultado foi favorable aos culés por un tenteo de 3-8, se ben agora as circunstancias se antollan diferentes.
Desa visita histórica ao González Laxe só quedan por parte do Hóckey Global Club Patín Cerceda o seu capitán, José Ramón López, e Martín Barrós «Neto». No caso do F. C. Barcelona, mantéñense daquel equipo Aitor Egurrola -non viaxará a Cerceda- Octavi Tarrés, Sergi Panadero e un mozoXavi Barroso, que acudía para suplir, as baixa de David Páez. José Ramón recorda que «foi un partido histórico porque non pensabamos que o F. C. Barcelona puidese visitar algún día a nosa pista. O encontro televisouse en directo pola segunda canle daTVG e o ambiente era magnífico, coas bancadas practicamente cheas. Ver aquí a Albert Borregán ou Sergi Panadero resultou absolutamente excepcional, aínda que tamén quedo cos tres goles que marcou Toni Pérez na recta final do partido, cando os xogadores adestrados entón por Fernando Pujalte baixaran un pouco o ritmo e o porteiro titular, Egurrola, fora substituído porOctavi Tarrés«.
Duelo desigual
Conscientes de que o de mañá será un duelo totalmente desequilibrado, pois para que se dea un resultado positivo os de Juan Copa terían que xogar un partido que raiase a perfección, mentres que os de Ricard Muñoz deberían de baixar moito o seu nivel habitual. Non obstante, o HG C. P. Cerceda é un conxunto moi sólido no González Laxe, onde esta tempada só se perdeu un partido de OK Liga, aínda que tamén a favor do F. C. Barcelona indicar que chega como líder indiscutible, despois de ceder unicamente un empate co C. E. Noia Freixanet e unha derrota no seu feudo do Palau ante o Monbus Igualada H. C., sendo este precisamente o único que conseguiu na presente campaña gañar na cancha de Cerceda.
Ademais os locais afrontan a cita cun dobre hándicap, pois por unha parte chegan coa moral moi reforzada tras a súa vitoria de onte en Reus, pero pola outra está o pouco descanso que tiveron sumado ao desprazamento dende Cataluña.
O partido da 23ª xornada da OK Liga celebrarase o martes 25 de marzo ás 21:00 horas no Pazo de Deportes Presidente González Laxe e será arbitrado polos colexiados F. Jorge García Romero e Miguel Díaz Cosme. As entradas poderanse adquirir na mesma entrada ao recinto dende 45 minutos antes do seu inicio a un prezo de 4 €.
Clasificación General
| Pos | Equipo | PJ | PG | PE | PP | GF | GC | TP |
| 1 | F.C. BARCELONA | 22 | 20 | 1 | 1 | 156 | 49 | 61 |
| 2 | H.C. Coinasa LICEO | 22 | 16 | 2 | 4 | 118 | 54 | 50 |
| 3 | C.P. VIC | 22 | 13 | 3 | 6 | 85 | 58 | 42 |
| 4 | REUS DEPORTIU | 22 | 12 | 5 | 5 | 109 | 74 | 41 |
| 5 | Moritz C.E. VENDRELL | 22 | 12 | 3 | 7 | 96 | 75 | 39 |
| 6 | C.E. NOIA Freixenet | 22 | 11 | 5 | 6 | 90 | 71 | 38 |
| 7 | C.P. CERCEDA | 22 | 9 | 6 | 7 | 86 | 79 | 33 |
| 8 | Monbus IGUALADA | 22 | 10 | 3 | 9 | 66 | 73 | 33 |
| 9 | C.P. VOLTREGA | 22 | 8 | 8 | 6 | 75 | 63 | 32 |
| 10 | C.P. CALAFELL Tot L Any | 22 | 9 | 5 | 8 | 81 | 78 | 32 |
| 11 | ICG Software LLEIDA | 22 | 7 | 4 | 11 | 66 | 83 | 25 |
| 12 | C.P. VILAFRANCA Capital del Vi | 22 | 5 | 5 | 12 | 75 | 96 | 20 |
| 13 | C.P. TORDERA | 22 | 6 | 2 | 14 | 61 | 102 | 20 |
| 14 | C.H. LLORET | 22 | 5 | 4 | 13 | 61 | 92 | 19 |
| 15 | Muralla Optica BLANES | 22 | 4 | 2 | 16 | 50 | 99 | 14 |
| 16 | C.P. VILANOVA | 22 | 0 | 0 | 22 | 53 | 182 | 0 |
El Boletín Coruñés 